[原创]gou gyaez sawcuengh

Beix gyaez nuengx caemh gyaez,

Raeuz doengzcaez daeuj hag;

Beixnuengx caemh diuz cag,

Rag sawcuengh hwnjsang!!!

Ciuhlaux byaij daeuj gvaq,

Coenz vah dangq liengx gim;

Dangh beixnuengx caezsim,

Namh bienq gim okdaeuj!!!

      Aeu Beixnuengx caezsim ,

      Yiet gim guh yezveiq ;

      Doxcomz youh do geiq ,

      Daih caez fat Sawcuengh !

     Guh Sawcuengh Yezveiq  cujciz giggouq dwg fat dad Sawcuengh  saehnieb it hangh ndei Saeh !

     Gou mbouj rox Daegdenz mwngz seizneix youq gizlawz guh hong ,gou couq mwngz gaep guh aen yezveiq ndeu baenz lawz yiengh ?

Gij fwen godenz ndei raixcaix

Gangj naeuz guh yezveiq,

Gijneix dwg saeh ndei;

Hojsik bonjsaeh yaez,

Fwngz raez genbuh dinj!

Nuengx dwg vunz ndaw rungh,

Youq laj gumh go'myaz;

Gangj coenz vah lawz ca,

Beix baema gaej lwnh!

Gangj guh fwen hwnjdaeuj,

Gou mbouj rox geijlai;

Miz saek dah saugvai,

Son baenz baiz cij ndaej!

Daegdenz rox fwen lai

Bak gvai lumj cat diengz

Dah lawz dangh ndaej riengz

Bae biengz dai da laep

Mwngz gangj gawq yienghneix,

Saedsaeh lo daegdoi;

Vunz baenz sueng baenz doiq,

Gag noix beix caengz miz!

Duzrwi ra ndaej gw(gwn),

Caenh gag lw duzmbaj;

Nuengx in beix gag gvaq,

Doeng saek dah hawj raeuz!

Mbanj dou miz Dahgyaez

Couh maez boux canghfwen

Dangh mwngz roenghdaeuj dwen

Sam ndwen giet baenz gouh

Gosuenq caeuq gocoeng,

Ndaej doengzcaez caemh luengx;

Gaeqboux caeuq funghvuengz,

Nanz ndaej doengz guhdoih.

Ciuq congh bak beix gangj,

Dajlamx seiq din mbwn;

Ei congh bak beixlwnz,

Dai vunz ceiq yungzheih!

Sam ndwen giet baenz gouh,

Gangj gij raeuh de gax!

Doengh yienghneix dih yah,

Dangq nyapnyaj hamq fai. 

   Gangj sau youh diem yah ,

   Viz hangx sou gyeng la ?

   Mbouj miz raeuz dien ha !

   Baenz gya  cungj siksanq !

   Diegcuengh bienq dieg gun ,

   Daihdaih vunz raeuz damq  ;

   Gik heiq daihdaih dam ,

   Mbouj gamj miz vunz fanj !

Caih vunz unq naeuz geng,

Liengh mbouj gven mwngz saeh;

Dangh mwngz caen bonjsaeh,

Cix gaej daeuj neix caemz!!!

Daegmwngz gangj baenz ak,

Gag bae fanj mbaej ha?

Vah raemh bae raemh ma,

Cix miz gijmaz yungh!

        Gangj lai mbouj miz yungh ,

        Doq bae guh cjj ndaej,

        Caez sim bae daj daej ,

        Roengz giek ndei hwnj louz !

            Aeu Beixnuengx caezsim ,

       Yiet gim guh yezveiq ;

       Doxcomz youh do geiq ,

       Daih caez fat Sawcuengh !