|
Ndwenloeg Hom Doh Va Govaiz 槐 香 六 月 Nazlah Yilinz (Bouxmanj)
Geij ngoenz neix hwnq mbonq hai cueng le, cungj miz raq heiqhom ndeu dongj haeujdaeuj, hoengqheiq cungj bienq ndaej vansubsub bae lo. Haetromh daengngoenz hwnj le, ndawsingz cix baenzngoenz hom va govaiz lo.
Vunzlai bingzseiz mbouj daiq maij govaiz geijlai, aenvih de maj ndaej nyauq yawj, naeng de nyaeuqnyatnyat, mbangj sang mbangj daemq maj ndaej mbouj bingzyaenz. Hoeng, va de hai le, gwnz faex de cix hausaksak, lumj dwg haujlai lingzngaenz venj youq gwnzde. Va govaiz baenz gwn. Mboujgvaq, ngamq miz valup seizhaenx mbouj daiq ndei gwn geijlai, yaek caj gij valup hai le, yaengyaeng rub baez ndeu, roix va govaiz ndeu cix doek haeuj aenbak mwngz bae lo. Lij iq seizhaenx, gij nyezdoih rox benz faex haenx ceiq ak, gij va govaiz maj ndaej daemq di haenx deng gyoengqdou yaeb caez le, dou cix baengh gij nyezdoih lingzvued haenx coengh dou bae mbaet gij va gizsang lo.
Va govaiz hai ndaej ceiq hoengh seizhaenx, hix dwg seiz langh duzrwi bae nyaeb gienghva oemq diengzrwi haenx. Gij vunz diegrog ciengx duzrwi haenx, youq gij dieg miz govaiz ceiq lai haenx, coq sieng dem sieng duzrwi roengzdaeuj le, cix youzcaih gyoengq duz gaenxhong de mbin okbae nyaeb gienghva. Lij geiq ndaej miz baez ndeu, youq gwnz roen bae hag, gou yawj raen miz vunz cingq mbaet va govaiz, swhgeij cix swnhfwngz gip diuz nye miz va lai haenx hwnjdaeuj gwn gij va de. Bouxlawz liuh ndaej daengz ndaw va haenx ndoj miz duzrwi ndeu, gou cix deng duzde ndat baez ndeu lo, gij in gokbak deng duzde ndat haenx youq gyang sim gou lij geiq ndaej maenhdwddwd nw.
Gij va govaiz, ngamqngamq hai seiz hom didi, ciemhciemh cix ngoenz hom gvaq ngoenz lo. Hoeng de mbouj caengq, mbouj hom ndaej hawj mwngz gyaeuj ngunh, de lij dwg rangsisi hawj vunz simsangj.
Bingzseiz mbouj miz vunz haeujsim govaiz lai, de cix lumj gij lwgsau lajmbanj, beij mbouj gvaq gij lwgsau ndawsingz cangndang ndaej gyaeundei lengjlet, hoeng de sawdikdik lumj mboq, de lai simsoh, mbouj fet mbouj ndwet. Caj aen seizhwngq moq youh daeuj daengz le, gij va govaiz haenx vunzlai ciuqyiengh mbouj cim de hwnjda, hoeng de vanzlij dwg lumj gaxgonq yienghhaenx rangsisi, homfwtfwt.
Doengxhaemh mbwn yied daeuj yied fuemx seizhaenx, youq gyang gij hoengqheiq liengzsisi, va govaiz cix lumj boux lwgsau gyaeundei ndeu, hawj mwngz cim de cix cim ndaej maezmwdmwd, hawj mwngz cij rox gamjsouh gij heiq seuqsaw de.
Banhaemh caemrwgrwg, gizgiz cungj hom va govaiz fedfed liux bae,vunz cungj deng gij hom gij rang neix maezmwd lo.
Bauq Minzcuz Guengjsae (Sawcuengh) Bi 2009 Ndwen 7 Ngoenz 1 《广西民族报》（壮）2009年7月1日版
Bouxraiz: Nazlah Yilinz (Dahlinz), Bouxmanj, vunz Gizlinz. De rox gangj Vahmanj, rox raiz Sawmanj, caemhcaiq gyaez Sawcuengh, rox Sawcuengh, ndiep Bouxcuengh. 作者简介：那拉.毓琳（达琳），满族，吉林人氏。难能可贵的是会满族语文，并且热爱壮文，学习壮文，热切希望大家都来热爱民族语文，壮族朋友学习本民族文字。达琳是咱壮族人民的好朋友，她都在热爱和积极学习咱们的民族文字，表示感谢。另外，咱也应该自觉学习学习了。
[此贴子已经被作者于2009-7-15 11:19:40编辑过] |
发表于 2009-7-12 10:30:00
发表于 2009-7-15 20:20:00