|
Goj geiq : Sauj ngeih ndaw ranz ! Lwg sau haq haeuj j mbanj , Ranz rongh bienq dah sauj ; Hwnj mbonq dawz baet sauq , Caj nuengx mbauq yangz dongx ! Coenz fwen haenx geiq roengz diegcuengh laj mbanj lwg sau gyoengq de caen dwg gaenz guh ak guh maenh guh , vunz baz bae haq ,haet daih it couh aeu guh gaenz ,bang boh meh guh hong ranz , guh hong rog ! Youq diegcuengh laj mbanj ,dah sauj gaenz guh ak guh maenh guh gig lai ! Sauj ngeih ndaw ranz gou ,daj Baeksaek haq ma ! Ngeih go bae Baeksaek mbanj fueng bang youx z hwnj ranz , gyoengq mbanj fueng guh ciet ngeih cib ,youq bak mbanj hai fwen ciengz , mwh haenx ,dah sauj ngeih gou guh lwg sau seiz eu fwen gig mengx ,ngeih go gou lak raen de sim gig angq haengj ,couh youq henz mbanj dieg byaek ,yaeb gaem va byaek henj ,dang ciengz youq naj daengx gyoengq soengq hawj de , gyoengq vunz homz dingq fwen haenx daih geij cib vunz doq hemq cumcum , aen vih coengz laiz mbouj miz vunz youq aen mbanj neix guh yiengh soengq va hawj gyoengq eu fwen lwg sau gvaq ,haemh haenx ndaw mbanj nauh yied dangq maz , Sauj ngeih gou dang ciengz doq sim gyaez Ngeih go gou ,fwen ciengz sat ,ngeih go couh yiu sauj ngeih bae henz daemz gangj goj , sauj ngeih sim haengj couh doq dap wngq , mbouj gvaq geij lai ngoenz ,song boux couh dox haengj dox gaen ,daengz bi sat ndaw cieng couh cingj louj lo ! Sauj ngeih gou lak haq ma ranz ,couh rox dawz ranz gou dang baenz ranz seng de ne , haet naengz haj diemj hwnj mbonq , cawj gu cuk lienz cawj samj mou ,byaek mou youq haemh gonq gaenq faeg ndei ! ranz gou mwh haenx ciengx haj duz mou cauq ,duz mou meh ndeu ! cawj sam gaen haeux bieg ,baenz cuk aeu aen cung ndeu ! gu samj cawj cug caemh aeu buenq aen lai cung , cawj ndaej cawj cug le ,bohmeh caeuq daengx ranz cij hwnj mbonq ,sauj ngeih gou couh gueng mou , caiq bae riengh vaiz dwk yangj ,yienz haeuh cij doq caeuq it heij gwn cuk ngaiz ! Gwn ngaiz sat , boh meh gou couh bae reih naz guh hong ,sauj ngeih caeuq gou caemh gaen bae guh ,ngeih go bae dieg rog daj caep ,noix ma ranz ! daih go daih sauj coux geij bi gaenq gag faen gwn lo ! Mbouj geij lai nanz ,gou caemh bae doeg saw gauh cungh , boh meh nienz geij caemh gaenq yak caet cib ,mbouj guh ndaej gij maz hong ,boh meh bang daeg go yawj lwg lan ,bang sauj ngeih bae ciengx di vaiz ,daengx ranz hong rog hong ndaw cienz bouh dwg sauj ngeih guh lo ! ndaw ranz mwh haenx miz sam moux naz roek moux reih ,haj faen dieg byaek , haj duz mou cauq ,duz mou meh ndeu , sam duz vaiz daeg ,duz vaiz meh ndeu , yiengh yiengh hong dwg youz sauj ngeih gou guh ,boh meh caemh bang yawj di vaiz ,ngeih go saek mbat ma ranz bang guh di cae rauq ,mwh haenx geij bi sauj ngeih gou cungj ndaej guh daengz reih naz mbouj vangh , mou vaiz mbouj yiek ,boh meh cingleix ndaej muenxeiq ! ndaem naz ,guenj naz ,ndaem reih guenj reih ( Ndaem sawz minz ndaem duh ) , ciengx mou , ngoenz nengz sam donq , cungj dwg gag de guh , ngoenz naengz guh hong hix mbouj gangj cienz ,hix mbouj miz vunz fat cienz hawj de , cienz gai mou ,gai duh ,gai sawz minz daih bouh faenh cungj dwg hawj gou dawz bae gyau yoz yaoq ! Sauj ngeih gou caen gaenz ,ak guh hix maenh guh ! Sauj ngeih laj mbanj caen hung mbwk ha ! |
发表于 2009-11-26 13:43:00
发表于 2009-11-26 18:40:00