|
Ban Sawq Son Sawcuengh Gojbungz Yienh Yimsingz Yaek Geznez
Ban sawq son Sawcuengh Gojbungz （古蓬）yienh gou, youq bigvaq ndwen 12 ngoenz 24 hauh hwnj dangz, dajco veh youq ndaw haj ndwen aeu guh baenz gij yinvu son saw. Daengz ndwen 5 ngoenz 27 hauh, saedsaeh hwnj dangz 128 ngoenz (cuengqgyaj mbouj suenq), haemh hag song diemjcung, gyonj hag 256 diemjcung, couh hag sat sam bonj sawhagsib, vunzguhnaz, beij dajco gij giva son saw lai vaiq cib geij ngoenz (couh dwg lai vaiq sam cib geij diemjcung) son liux. Seizneix cingq dauq gyonj un gvaq, youq ndwen 6 ngoenz 4 ndaej geznez lo.
Daengx ban seiq cib boux bouxhag youq ndaw haglienh cungj mbouj mbwq mbouj naiq, naebsim beij hag. Seizneix, daengx ban bouxhag cib boux miz gouj boux rox doeg rox yungh gij mehsing, mehyinh caeuq singdiuh, lij dawz gij govaenz gag doeg ndaej roengzbae; cib boux miz caet boux rox yungh Sawcuengh ma sij mingzcoh vunz, mingz dieg, fei, ngoenzgeiq caeuq saenq lo. Bouxhag mehmbwk Fanz Yiqsingh, Fanz Yiqsiuq caeuq Veiz Beiqcih…cib geij vunz, dajco cungj mbouj rox saek cih saw, seizneix gaenq rox yungh Sawcuengh ma giluz, sij goj caeuq cauh fwen; gyoengqde cungj sij ndaej saenq caeuq faenzcieng miz saek bak haj daengz sam bak cih saw lo, ndaw de baen cingcuj, leixsaw caemh doeng, fapvah dingzlai caemh hab. Gyoengqde mboujgag rox doeg rox sij, caemhcaiq rox dawz gij Sawcuengh hag ndaej haenx yungh daengz ndaw ngoenznaengz gwndaenj caeuq swnghcanj bae, lumjbaenz dawz ma geiq goengfaen, sij saenq hawj doenghboux caencik baengzyoux rox Sawcuengh haenx lo.
Daj seizneix hwnj, gyoengqde caiq mbouj dwg vunz mengzsaw lo, ndaw sim angq dwk gangj mbouj liux!
Yiq Bingjfanz sij
Vangz Gvangh hoiz
Hong Sawcuengh bonj bi 1958
[此贴子已经被作者于2010-9-9 22:34:32编辑过] |
发表于 2010-9-9 22:17:00
