[原创] Ciet lauxsae gangj haenq laux sae

                         Ciet Laux sae hawj gou yap yuk hawj gou ngvun

     Ciet lauxsae  daeuj daengz lo , laux sae son saw raeuz  gig mbouj yungz haeh , hwnj dangz ndwn , bak gangj baeg , gwn faenj bit , gaij geij cib bonj buengj , guenj hag seng dox douq dx hoenx  !  boih geij cib boux coh hag seng !  ngvanh ngvanh  hwnj daeuj ,hangz hong neix caen dwg mbouj ndei gwn !

    Danh dwg doeng liux  cib geij bi saw ,  youq danh veiq guh  hong saeh seveiq , caeuq vunz gun it heij guh hong saeh ,miz  song diuz  hawj gou doiq lau sae   huj heiq   it cig  haem  youq ndaw sim gou  , mbouj gangj mbouj ndaej : 

     Diuz it dwg : caet bi bae hag dangz doeg saw , Laux sae song raeuz sij  cih saw gun seiz ,mbouj song raeuz cih sawgun  guihfam sij fap , aen vih  ngamj haeuj   hag ,   vunz iq rengz ngoiz ,gaem bit mbouj   ndaet  ,cau sij   banj saw gun  lumj  geiq viq ne ,  cih saw vang lumj ngwz byaij ,daengj  lumj ngez faex  ,cih saw gun it cig cungj sij mbouj baenz  , bit veh gan miz gan deng , hoeng cih de  mbouj mbieng couh ngeng ngauj , gig mbouj  ndei yawj  , cih saw gun mbouj rox baenz lawz sij cij deng guih famq !  caenh nyinh naeuz yawj cih de ndaej rox couh ndaej lu ,giz saed ,sij cih de ok daeuj , mbouj danh vunz wnq   yawj mbouj rox ! sij gvaq  bonj faenh caiq dauq yawj , mbangj cih bonj faenh caemh caiq nyinh mbouj rox cih  de dwg cih maz  !  It cig daeuj ,gou dawz bit sij coz vwnz ,cih saw caen dwg yak yawj !  Daengz doeg Cuhcungh le ,yijvwnz laux sae caen dwg gangj gou cih saw sij mbouj cingq !  Gou caeuq laux sae ceng : Mauz  cujsiz  sij cih saw bij gou lij  lumj geiq viq , lij dang Guekgya cujsiz dem  ne ? Mwh haenx ,laux sae caen dwg bak ngaemx !  Daengz  doeg gauh cungh le  ,gag bae yawj saw ,gou cij  gag rox sij cih saw gun miz hauj lai cungj sij fap ,miz cinggaih dij , hung ,iq sungqdij  , miz caujdij , Mauz Cujsiz dwg  haengj  sij caujdiq ,yiengh neix ,gou cij rox aeu bit menh menh ciuq cih cinggaih veh ,hoeng ,aen vih sij cih saw gaenq gvenq lo ,gig hoj vut dauq ma , moix daengz nvanh sij faenz cieng ,cih fwngz gag ciuq  gvenq veh , it cig daeuj ,gou  sij cih saw gun cungj dwg sij mbouj ndei ,sij faenz cieng hawj vunz wnq  hawj lingj dauj yawj ,aeu dauq cungz cau gvaq cij ndeij !  Mwh haenx ,gou couh haenq laux sae lo ,vih maz gou haeuj hag ngamq hag  sij cih saw gun seiz  , laux sae vih maz mbouj son gou ciuq cih sungq dij sij ,rox naeuz hawj gouq ciuq cih cingq gaih dij  veh sij ne ?  dang naeuz daj iq daj ngamq hag couh hawj gou ciuq cih guihfamq sij ,daengz hung gou sij faenz cieng couh mbouj baenz dwg rengz lo !  

     Diuz daih ngaeh  haenq laux sae dwg :  Daj iq mbouj miz vunz naeuz gou ngyi gou dwg aen minz cuz vunz vunz  cuengh , daengz hag dangz doeg saw ,laux sae hix mbouj gangj hag cih saw dwg sawgun ,doengh cih saw dwg ciuq vunz gun gangj , cih saw doeng fap  caeuq vah raeuz mbouj  dox doengz , gou caenh nyinh naeuz gij vah haenx dwg vah coj goeng geq  mbouj hag mbouj ndaej ! laux sae  caenh   bik raeuz hag bik  raeuz geiq ! aen vih bik daiq lai , aen sim bonj faenh gag seng miz fanj gamj ,yiengh neix ,aen uk caenh muengh vaiq roengz dang ,vaiq ndaej gaij fang bae guh angq !  Doeng saw gun doiq gou ma gangj caen dwg  beij dawz bae gyaeng lij nanz youq ! Aen vih hag caeuq gangj mbouj dox doengz ,doengh haj bi saw siuj hag , lij mbouj rox sij coz vwnz ! Boh youq rog guh hong saeh ,hix mbouj rox yungj sij saenq fueng fap sij naeuz boh nyi !  Caen dwg ngawz ha ! Moix mbat  nvanh daengz mwh neix ,caen dwg raem da loenq ! 

   Ciet Lauxsae daeuj daengz ,hawj gou yap yuk hawj gou ngvun !