|
|
本帖最后由 tengweichan 于 2013-2-16 13:09 编辑
Bi'gvaq,daeglwg gou daj gwnz gvaqlig boih ndaej
haujlai coenz-ndei:Goengheij fatcaiz,bilungz angqyangz,
daihgit daihleih......De baez bungz raenz vunz,mboujlwnh
mwngz dwg caencik,ranznden,cijaeu de roxnaj,couh dawz
gij vah gitleih daj gyaeuj daengz rieng boih lwnz he,boih
sat couh ndwn youq baihnaj mwngz yawj mwngz,de mbouj
ok sing,yawj mwngz baenzlawz guh,raen mwngz mbouj
cuengq fwngz haeujdaeh bae ra fungbau,de cij daezsingj
mwngz lumz leux gijmaz lo.Yawj aen yienghsiengq de,
couh lumj dwg bohmeh son baenz.
Bi neix,vih liux mbouj saetnaj,gou caeux couh hawj de
"Dajcim"----Bungz raen aulungz mehsimj,cij ndaej gangj"
Goengheij fatcaiz",vunz hawj mbouj hawj fungbaucaih de,
mbouj ndaej cam aeu.
Cieng coit,daiq lwg ma daengz ndaw mbanj.Seiz haeux-
ngaiz,auhaj daeuj gwn laeuj,lwg gou couh heuh:"Auhaj,
goengheij fatcaiz."Gangj sat couh yaek cienqndang bae guhcaemz,mbouj cam aeu fungbau,dwg auhaj gag ndenq
aen fungbau hawj de.Lwg gou ciep gvaq fungbau,naj riu
lumj duj va,dangqnaj auhaj couh doiq gou gangj:"Meh,
mbat neix mbouj dwg gou cam aeu fungbau lo,dwg de
gag hawj,mbouj gven gou saeh."Ndaek fangzraq neix,
guh maz yienghneix gangj coenz ne?Gou caen dwg naemj
ra aen congh con haeuj bae.Hoeng,gij saeh hawj mwngz
engq naemj mbouj daengz haenx,lij youq baihlaeng.
Seiz haeuxcaeuz,auhaj、aubiuj、go'ngeih youh daeuj
gwn laeuj.Auhaj sien haeujdaeuj,lwg gou couh caegcaeg
cam boh de:“Auhaj hawj fungbau caengz."Boh de han:"
Hawj gvaq lo,mbouj ndaej cam,mbouj rox saeh."Ciep dwk
dwg aubiuj cit diuz ien haeujdaeuj,lwg gou youhcaegcaeg
cam boh de:"Aubiuj hawj fungbau caengz?"Singyaem de
yienznaeuz dwg daemq,hoeng,bouxboux cungj dingq ndaej
cingcing cujcuj,nyaenq ndaej song gvanbaz gou ndaq mbouj
baenz ndok mbouj baenz,ciep roengzdaeuj dwg go'ngeih,
goenggeq......Lwg gou cungj ciuq yiengh cam gvaq.Gou cij
siengj vaiq di ndaej ma ranz......
Hwnj congz ninz lo,lwg gou lij geq lwgfwngz de naeuz:"
Lij miz yahdaiq、goengda、bohnax、mehnax.......Boux he
cib maenz,hwhwhw........"
Gou hoen bae couh de lo.
|
|
发表于 2013-2-13 19:30:45
发表于 2013-2-13 21:04:41