|
|
本帖最后由 tengweichan 于 2013-4-2 16:21 编辑
Ngoenz neix yazdaiq hoihhek,lwgsau gojyez cungj daiq lwg ma.Bi
daengz haemh,cij dwg ngoenzneix cejnuengx cij ndaej raen naj,coenz-
hauq caenj baenz bi, baez raen naj couh lumj raemxrongz cung lak fai
bouxboux dox ciengj gangj.
Gwn haeux sat,lwgnyez gag coemz guh doih he loengh soujgih youzgi,
gou、dahcej、sam boux daxheiz、yazdaiq、daihsauj guhdoih gangjcoenz,
vunzsai cix gag gwn raeuj gangjgoj.
Daxheiz haq nanzningz haenx gangj daengz lwgsau de,naj riunyumnyum,
lumj duj va nei.De gangj:"Dahsau gou bi neix cibbet lo,gyaeu raixcaix,naj hau
youh hoengzmeiq,youh rox saeh,gaenq miz haujlai vunz daeuj cam aeu daeuj
guh yah lo,youh cungj dwg vunz miz cienz."Gangj dwk de youh angq dwk
riu hwnjdaeuj,caeuh lumj dwg de ndaej bae haq ne.
Daxheiz haq gwnz haw hix han naeuz:"Dwg ha,baez yaep dah,dahsau
couh haq ndaej lo,raeuz caemh laux lo."
Daxheiziq danq gaemz heiq ndeu,naeuz:"Naemj raen gou cibbet seiz,
aen hwet lumj hwet duzdangzrwi,daenj geu gunz byaij gvaq hawciengz,lwg-
mbauq siuqrumz gvetgvet,geijlai foengz ha,hoeng,seizneix,meh hwet gou lumj
meh doengjraemx.yiengh bienq liux lo.laux lo."
Daxheiz haq nanzningz haenx ciep bak gangj:"Gou cibbet couh bae haq
lo,ngoenzdaengzcungj vih liux ra gwn song can ,ra haet mbouj raen haemh,
seng lwg liux youh ciengx lwg,youh soengq doegsaw,haemzhaemz hojhoj,
bahbah baeqbaeq,cungj lumj mbouj raen gou hauxseng gvaq,caj daengz lwg
hung soeng gaemz heiq ndeu,gou caemh laux lo........Hw,hw,hw,gou
mbouj siengj laux baenz vaiq."
Gyoengqvunz riusagsag,dwg ha,bouxlawz mbouj naemj bi bi dwg cibbet,
bouxlawz youh siengj laux bae.
|
|
发表于 2013-4-2 10:10:59