[原创]Mbanjcuengh Gyaeu(壮乡美)

1) Mbanjcuengh raeuz ,

Gangj gij gyaeu fouz beij ,

Gveiqlinz sanhsuij gyap dien'yah,

Bwzhaij Yinzdanh gyap Cunghvaz,

Manva lij daihngeih.

2) Mbanjcuengh gyaeu,

Mbouj dwg raeuz gag haenh,

Seiqgeiq bya heu va mbouj caenh,

Sikseiq faex raemh mak cungj baenz,

Byawz mbouj haenh mbanjcuengh.

3) Haenh mbanjcuengh,

Hanz geq cungj mbouj caez,

Bya heu raemx saw dieg caen ndei,

Bouxlawz daeuj cet sim mbouj maez,

Ceiq gyaez raeuz mbanjcuengh.

4) Gyaez mbanjcuengh,

Raeuz beixnuengx diuz sim,

Roengzrengz ganq de namh bienq gim,

Gvangjsih mwnqlawz mbouj Gveiqlinz,

Cibcingz raeuz mbanjcuengh.

------ Daegdenz Ranzcung

Ciep Daegdienz ranzcung :

Vunzcuengh Ngawz

1) Vunzcuengh ngawz ,

Bouxboux ngawz fouz beij ,

Sawcuengh geij lai dwg siencin ,

Doi hengz geij cib bi mbouj hwnj ,

Mbwn guh naeuz vunz guh ?

2 ) Vunzcuengh guh ,

Vunzcuengh guh saeh ngawz ,

Hong saeh Sawcuengh ngaiz hamh caeh !

Vunzcuengh guh maz mbouj baenz saeh !

Sim geij lai naixniek !

3 ) Damq Vunzcuengh ,

Mbouj dwg seng ok ngawz ,

Aen vih Vunzgun apnaenx raeuz ,

Gvaeg raeuz dwk raeuz youh haep raeuz,

Raeuz mbouj ndaej guh cawj !

4 ) Muengh Vunzcuengh ,

Bouxboux yungh Sawcuengh ,

Caux ok Vunzcuengh dien hah raeuz ,

Cauxok Vunzcuengh Guekgya raeuz !

Hawj vunzraeuz angqyangx !

Gou ceiq ngawz !

Hag sawq guh fwen doiq,

Cih saw boiq mbouj rouz mbouj led ,

Au mwngz yawj houh daez yigen !

Gou sien neix docih !

A.Cauyingj .Vangz

2004.12. 20.

Gangj guh fwen hwnjdaeuj ,

Gou mbouj rox geij lai ;

Muengh faenhsou bouxgvai ,

Lai son'yinx cij ndaej .

Gangj guh fwen hwnj daeuj ,

Boux gyaeuj dwg cej sam,

Raeuz seiz neix dox damz,

Ngamq rox doiq song coenz .

Gangj guh fwen hwnjdaeuj ,

Baengzyoux dwg Cejsam ;

Raeuz seizneix doxdamz ,

Mwngz han gou cix haemq .

Gangj guh fwen hwnj daeuj,

Beij mbouj gvaq Cejsam ,

Mbouj lau Vunzgun hamh ;

Fwen gamj ndaq Caizcawj !

Gangj guh fwen hwnjdaeuj ,

Baengzyoux dangq Cejsam ;

Gou yawj daengx ndaw ranz ,

Suenq doengzban leixhaih .

Ayingj beixnuengx mwngz ,

Daeuj doiqfwen luvei ;

Faenhgou gag youq neix ,

Caen aeuqheiq ndaej lai .

Gou mbouj rox sij go, hoeng, gou gyaez yawj go doeg go, ciq yawj go doeg go daeuj hag Sawcuengh.

Daegdenz caeuq Ayingj beixnuengx caiq daeuj ok geij got go vei.

"Daegdenz caeuq Ayingj beixnuengx caiq daeuj ok geij got go vei" wngdwg:

"Daegdenz caeuq Ayingj beixnuengx caiq nem geij hot go okdaeuj hawj raeuz yawj vei"

Mbouj rox vihmaz gou mbouj bien cih ndaej.

Gangj guh fwen hwnj daeuj ,

Gou mbouj rox geij lai ;

Guh fwen doiq vunz gvai !

Guh saw vaiq deuz dag !