[原创] Youz Diegcuengh Baksaek (5)

---------- Laep Youz Singz Baksaek -------

Sij diep fat diep sat , gou byaij ok Vangjbah ,aen singz Baksawk gaenq caem cimq youq daeng hongz daeng henj ndaw de , ci caeuq vunz dauq beij banngoenz lai .Singz Baksaek , Gou youq neix gwn youq guh seng eiq yaek baenz bi gvaq ,doiq moix it diuz gai cungj gig sug , bet bi lai lo, dauq byaij hwnj daeuj ,saeh gouq mbouj duenh yoed ronx ok da ok uk .Singz Baksaek gij gai gouq mbouj miz gij maz bienq ,hoeng , aen Dijyuzcangz gaenq gaij baenz giz dieg daj baij dox gaiq hai ,caiq byaij gvaq bae ,miz song diuz gai moq hawj gou da rongh, song diuz gai gak aen dan bouq hwnj ndaej daeg bied miz diegbfueng daek saek , daengx diuz gai cungj aeu hongz ,henj, eu ,bieg ,ouj ,o gak saek duzliuh duz gvaq gyaeu ndei ,gai mienh bu dieg cienbanj seuqsaksak, faex va cang gyaeu muenx gai , caiq gya gak saek daeng rongh ciuq ingj , daengx diuz gai caen dwg lumj gim caw ok ngaeuz , hawj vunz byaij youq ndaw de gig sim onj sim swnh ,cungj yiengh gamj souh neix ,gou cij dwg byaij gvaq Baekging Vangzfujcingj rox naeuz Sanghaij roen Namzgingh cij ndaej rox ngyinh daengz , daj ndaw caemh yawj raen Cwngfuj boux lingj dauj gij yungh sim .

Aen singz Baksaek cungq gan , cib dingz vunz miz sam dingz vunz gangj Vahbeg,sam dingz vunz gangj Vahcuengh ,song dingz vunz gangj vah Gveiliuj ,song dingz vunz gangj vah Bujdungh ,vunz gig cab ,youq diuz gai liz siq cungq gan haemq gyae ,cij dwg Vunzcuengh Vahcuengh dieg gei ,Vunzcuengh gangj cuengh cab begvah dwg it cungj daek saek ,lumj : Mwngz gwn ciujhauq lwi ? [Ciujhauq ] couh dwg beg vah ,lij miz hauj lai .

Gou byaij bae seiz youq Baksaek guh sengeiq seiz ceiq haengj youq giz haenx youz cet gwn louj bej dieg fueng -----Gyaeuj gyiuz .diuz giuz haenx coh heuh Giuz Gaijfang, gyaeuj gyiuz doiq mienh dwg Gijnenq Beih ,gyaeuj gyiuz baih neix miz hauj lai guh [ Ciujhauq],gou couh [Ciujhauq ] doiq Loujbej ,menhmenh yawj gingjcaeq ,doq caem ngeix doengh baez caeuq sau youx youq giz haenx guh cet riu angq cik saeh gouq , caen dwg :

Gim ngaenz cien fanh dij,

Yungh liux lij ndaej ra;

Baengzyoux caen cingz hax !

Biek lex nanz aeu dauq .

Gou cingq youq giz haenx Gwn loujbej ,sawq mwh miz vunz hemq : Gaemh caeg ha ! Gaemh caeg ha ! Dwg sing Begvah ,gou yawj gvaq bae ,dwg miz dah caj aeu [Ciujhauq ] ndeu aen daeh ngaiz vunz ciengj ,miz daeg haux seng cib caet bet bi baenz neix fwngz gaem aen daeh vunzbaz buet gvaq dangq naj gou, gou mbouj miz maz siengj ,ndwn hwnj ndang ,gij ga gou lumj miz boux wnq yoengx ne ,gag rox yiet gvaq bae ,aen ndang gou swnh cang guh yaek caeuq de dox daemj , gij ga gou cingq ngamj ngou dawz cig ga yamq lang de ,daeg dawz dae buet haenx doq laemx gvuep ,aen daeh doq bi gvaq baih naj hauj gyae ! Daeg laemx haenx aen ndang caemh seuq ,ngamq laemx couh vaiq byenz hwnj daeuj ,yawj cungj mbouj yawj hen vunz , ngaem gyaeuj couh buekmingh daih buet gvaq gyiuz bae , miz vunz yaebh aen daeh haenx gyau boiz dah sau ngaiz caeg haenx ,Vunzgiz haenx mbouj rox fat seng gij maz saeh ,caenh raen dah sau ngaiz caeg duet daeh haenx naeuz : Docih ,docij ! Gou caemh mbouj ndaej youq giz haenx gwn loujbej lo , couh dap Mohdoz bae Cehcanq dap banci dauq ma Denzyangz youq, yaek daj Denzyangz dap ci bae Dwzbauj haemq gaenh !

Haemh haenx dwg co seiq ha !

Ayingj, mwngz seizneix lij youq Baksaek guh seng'eiq lui? Vunz Baksaek ndei mbouj ndei gangj? Aen mbei mwngz haemq gaeuq hung bw, gamj bae gaemh dawz ndaek caeg haenx, mwngz mbouj lau de gaem cax daeuj gaj mwngz ha? Gou boiqfug mwngz!

Mwngz haemh co ngux bae yienhsingz Dwzbauj yawj fwenhoih caengz? Fwenhoih lawzyiengh?

Lau ha !Gou caemh lau gij doih bouxcaeg haenx dawz cax ndaemq gou ,yiengh haenx gou mbouj gamj youq Baksaek youq !

Saeh Fwen hoih caj gou menhmenh sij !